راهنما
دادخواست سایتیندان استفاده یؤندمی
متن حاضیردیرسا، دیلکچه حاضیرلاما پروسه‌سینی تاماملاماق اوچون، اونو دؤرد یئیین آددیملا یوکله‌یه بیلرسینیز. یوکلندیکدن سونرا، دیلکچه‌نیز قئید ائدیلیر و دیلکچه اکیپی طرفیندن اینجه‌له‌نیب، یایینلانماغا حاضیرلانیر.
دیلکچه اکیپی‌نین خیدمت‌لری
بو خیدمت‌لر، متنین دیل باخیمیندان دوزنلنمه‌سینی، فاکتلارینین دوغرولوغونو و گئرچکلییی‌نین یوخلانیلماسی و حقوقی کونترولو ایچریر. گرکیرسه، متنی اینگیلیسجه و یا یئرلی دیللره چئوریلمه‌سینه کؤمک ائده‌جه‌ییک.
قایدالار
دادخواست سایتیندا یایینلانان هر شئی سایتین استانداردلارینا اویغون اولمالی‌دیر. بو باره‌ده دادخواست سایتی‌نین قایدا قوراللارینا باخین.
اؤزللیکله بو ایکی پرنسیبه دیققتینیزی چکیریک:
- دادخواست سایتیندا یازی یایینلایان شخص، یازینین کیمسه‌یه توهین ائتمه‌مه‌سی، کیمسه‌نین قانونی حاقلارینی پوزمادیغینی، کیمسه‌نین شخصی حیاتی‌نین پوزمادیغینی تضمین ائدر.
- دادخواست سایتی بیریسی و یا بیریسی‌لری، بیر قروپو و یا قروپلاری اؤزباشینا و اساس‌سیز شکیلده مظلوم و یا ظالم موقعینده یئرلشدیردییی آنلاشیلان ماتئریاللاری یایینلاماز.
دیلکچه یازماق حاققیندا داها آرتیق بیلگی
متنیمیز اوچون هانسی باشلیغی سئچمه‌لیییک؟
باشلیق متندن گؤرونن ایلک شئی‌دیر و مخاطبین ایلگیسینی چکمکده اؤنملی رول اوینایار. مخاطب متنین نه دئدییینی، موضوعونون نجور بیر دوروم ده‌ییشیکلییی ایسته‌دییینی اؤیرنمه‌لی‌دیر کی، هارداسا باسقی و آیری سئچکی‌لیک آرادان قالخسین و یا دیققتسیزلیییه سون قویولسون.
■ قیسا یازاق
باشلیق بیر باخیشدا گؤرولوب باشا دوشولمه‌لی‌دیر، هابئله اجتماعی شبکه‌لرده پایلاشماغا اویغون اولمالی‌دیر. توصیه: هارداسا 10 کلمه!
■ یازدیغیمیز باشلیق بیزیم ایسته‌ییمیزله ایلگیلی اولمالی‌دیر
باشلیقدا نه اوچون دایانیشدیغیمیزی و ایسته‌ییمیزی دئیک. بئله‌لیکله بیزیمله عینی گؤروشده اولان مخاطب، متنی اوخویوب امضالاماسینا اینانار.
■ چکیجی و تشویق ائدیجی یازاق
باشلیق دویغوسال اولمالی و اوخوجونون فرقینده‌لییی ایله دویغولارینا خطاب ائدیلمه‌لی‌دیر.
■ مسئله نه‌دیر؟
متن اوزون بیر گیریشله باشلامامالی‌دیر. بیر باشا اصیل مسئله‌یه توخونوب، گرکیرسه آردیندا موضوعونو آچیقلامالی، سونوندا ایسه مسئله‌نین اؤزونه و ایسته‌یه دؤنمهلیدیر. بو شکیلده متنین اوپتیمال یاپیسینی آچیقلایا بیلریک: 1) دیققتیمیزی چکن ایسته‌نیلمه‌ینی قیسا و بیر باشا آچیقلامالیییق، 2) بو شئی نه‌دیر و اونون هانسی تاریخی ایله آرخا پلانی واردیر، 3) هانسی ده‌ییشیکلییی اولمالی‌دیر؟
■ آچیق-آیدین ایستک
همی مسئله معین ائدیلمه‌لی‌دیر، همی ده ایستک. بیر دیلکچه ایله دونیانین بیر سیرا پروبلئملرینی حل ائتمک اولماز. متن بیر مسئله‌نین اوستونه اوداخلانمالی‌دیر.
■ دوزگون و حقوقی بیر دیل
حقوقون تخصصی دیلیندن استفاده ائتمه‌دن، متنین حقوقی بیر دیلی اولمالی‌دیر. سرت، سالدیرقان سؤزلر، حددیندن آرتیق صفت، شیشیرتمه، اوزون-اوزوادی دانیشمالار… بوتون بونلار متنین چکیجی‌لییینی و تاثیرینی آزالدار. اینسانلارا قارشی حاقسیز مناسبت‌لردن اوزاق دورولمالی‌دیر.
■ منیم مسئله‌م سنین مئسله‌ندیر دهمتن داها چوخ اینسانلاری اؤزونه جذب ائتمه‌لی‌دیر. اینسانلارین اصیل موضوعدا بیزیمله عینی گؤروشده اولوب، آنجاق ایفاده شکیلیمیزی به‌ینمه‌دیکلرینه دیققت ائتمه‌لیییک. منیم مئسله‌م سنین مسئله‌ندیر، بو اوزدن دیلیمیزین ده بیر-بیرینه یاخین اولماسینا چالیشمالیییق.
متنین شکیلیدادخواست اکیپی پروفئشنال تاساریمچیسی‌نین یاردیمی ایله سیزه اویغون شکیل تاسارلایاجاقدیر. سیز بیر شکیل یوکله‌مکله اکیپه یاردیمچی اولابیلرسینیز.
■ هانسی شکیلی سئچمه‌لیییک؟
موضوعو ایله ایلگیلی، باغلامی و هدف کوتله‌سی ایله علاقه‌لی بیر شکیل سئچک، مثلا رسمی بیر مقام. اینسانین شکیلده اولماسی یاخجی اولار. شکیل بیر مکاندیرسا موضوعو ایله ایلگیلی اولمالی‌دیر (مثلا معین شهرده هاوا کیرلیلیییندن سؤز گئدیرسه، او شهردن آیدین بیر شکیل سئچک).
■ قرار وئریجی مخاطب
هر بیر دایانیشما متنی‌نین گئنللیکله متن‌ده ایره‌لی سورولن طلب دوغرولتوسوندا قرار وئره‌بیله‌جک و حرکته کئچه‌بیله‌جک شخصص و یا قورومدان عبارت بیر مخاطبی واردیر. بو اوزدن او شخصه و یا قوروما دایانیشما ادبیاتیندا «قرار وئریجی» ده دئیرلر.طبیعی اولاراق «قرار وئریجی» بیزیم موضوعوموز حاققیندا دا نظر وئره بیلمه‌لی‌دیر. مثلا بیز ایش قضالارینین قاباغینی آلماق اوچون تدبیرلر گؤرمک ایسته‌ییریک. مکتوبا بنزه‌ین متنیمیزی، پرزدئنت کیمی اونون دا بو ایشده مسئولیتی اولان شخص دئییل بلکه اصلینده ایش ناظیرینه یازمالیییق.
■ مخاطبین ایمیلی
متنین و امضالارین او آدرسه گؤندریله بیلمه‌سی اوچون مخاطبین ایمیل آدرسینی تاپماغا چالیشاق. (ایلگیلی ایمیل یوخدورسا، ایشی یوباتمایاق. دادخواست سایتینی دولاندیرانلار اونو تاپماغا چالیشارلار.)
تئز-تئز سوروشولان سواللار
بیر دیلکچه نئجه بیزه یاردیمچی اولابیلر؟
بیر دیلکچه دایانیشان بیریسی‌نین سسینی اوجالدیب و جامعه‌نین ایچینه آپارا. سیاسی و یا اجتماعی بیر پروبئلمی اینسانلارلا پایلاشا بیلر. یئرلی، میللی و بین‌الخالق سویه‌لرده مختلف وظیفه‌لی شخص‍لره و قرار وئریجی‌لره مراجعت ائدرک، اونلاردان دویارلی و سورون چؤزوجو اولمالارینی ایسته‌یر. بیر دیلکچه اجتماعی و یا سیاسی ده‌ییشیکلییین قایناغی اولابیلر. کیچیک بیر ده‌ییشیکلیک بئله اینسانلارین مدنی یاشامینی یاخجی‌لاشدیرا بیلر.
بیر دیلکچه‌نین امضالاماسی‌نین فایداسی نه‌دیر؟
دیلکچه بیر شخصین دایانیشماسی‌نین سسینی کوللئکتیو بیر سسه دؤنوشدورر. بیر موضوعدا کامپانییا یولا سالیب، آرتیق دستک و امضا ییغماقلا، دایانیشما سسی ده گوجله‌نر. یوزلر و مینلر نفر بیر دیلکچه‌یه مثبت رای وئره‌جکلر. کوللئکتیو سسی گؤرمزدن گلمه‌نین احتمالی آزدیر.
بیر دیلکچه‌نین یازماسی‌نین بیرینجی آددیمی نه‌دیر؟ بیر دیلکچه یازماغین نئچه مرحله‌سی واردیر؟
آچیقلامادان قیسا بیر متنله پروبلئمی دیله گتیره بیلرسیز: بیر حاققین پوزولدوغو، فردی و یا اجتماعی یاشامین ضرر گؤردویو یا فیکرینیزی مشغول ائدن هر هانسی بیر اجتماعی موضوع. عینا بیر دوستلا دانیشارکن غیری-رسمی اولاراق بیر پروبلئمی پایلاشدیغیمیز کیمی، بورادا دا مسئله‌نی اوزاتمادان تانیتدیریریق.
بیر دیلکچه‌نین مختلف بؤلوملری نه اولمالی‌دیر؟
دیلکچه‌نین آنا بؤلومو چاره آختاردیغیمیز مسئله‌نین و یا پروبلئمی آنلاتماقدیر. او وضعیتدن مسئولیتی اولان بیریسی و یا بیریسی‌لری تانیییریقسا اونلاری تانیتدیریریق. دیلکچه گئنللیکله پروبلئمین حللینه یاردیمچی اولابیله‌جه‌یینی دوشوندویوموز رسمی بیر مقاما گؤندریلیر.
دیلکچه‌نین متنی نه قدر اولمالی‌دیر؟
دیلکچه‌نین متنی اوزون اولماسا یاخجی‌دیر. قیسا دیلکچه‌لرین اوخوجوسو چوخ اولور. اوزون بیر گیریش یازماغا احتیاج یوخدور. بیر باشا اصیل موضوعا کئچمک لازیمدیر. دیلکچه‌نین متنی بیر و یا بیر نئچه پاراقراف اولابیلر.
دیلکچه‌نین یازماسیندا دادخواست سایتیندان یاردیم آلماق اولارمی؟
هه. دادخواست اکیپی سیزین متنیزی ائدیت ائله‌ییب و گرکیرسه دقیق‌لشدیرمه‌سی اوچون هر زامان حاضیردیر.
دیلکچه‌نی یازان شخص اؤز حقیقی آدی ایله ایمیلینی دیلکچه‌ده یازمالی‌دیرمی؟
یوخ. سیز دیلکچه‌نین یازانی اولاراق تاخما آد و تاخما ایمیلدن استفاده ائده بیلرسینیز.
دیلکچه یازماقدا هر هانسی یاساق بیر موضوع واردیرمی؟
اجتماعی ده‌ییشیکلیییه و یا دایانیشمایا یول آچان هر بیر موضوعونو دادخواست‌دا یازماق اولار. شخصی حیات و کیمسه‌یه توهین ائتمه‌مه قایدالارینی اوخوماق اوچون سایتین «بلدچی» بؤلومونه باش وورا بیلرسیز.
دادخواست سایتی بیر دیلکچه‌نین متنینی یازیچی‌نین طرفیندن ایلگیلی مقاما و یا قرار وئریجی قوروما گؤندره بیلرمی؟
هه، بیر دیلکچه اوچون چوخ ساییدا امضا توپلانیرسا، ایستر ایرانلی اولسون، ایسترسه ده خاریجی اولسون، دیلکچه‌نین مخاطبی اولان قرار وئریجی مقاما گؤندریب بیزه جاواب وئرمه‌لرینی ایسته‌مک مومکوندور. بو باره‌ده قرار وئرمک دادخواست اکیپی ایله‌دیر. البته دیلکچه‌نی یازان بیریسی اولاراق، توپلانان امضالارلا بیرلیکده هر زامان باغیمسیز اولاراق ایلگیلی مقاما و یا مقاملارا گؤندره بیلرسینیز. دادخواست سایتیندان امضلارین یئر آلدیغی دیلکچه‌نین پی‌دی‌اف فورمتینی ائندیره بیلرسیز.
دیلکچه یایینلاناندان سونرا نه اولور؟
دادخواست‌ین رسمی سایتیندا (https://www.daadkhast.org)، یایینلاندیقدان سونرا، سیزدن یعنی دیلکچه‌نی یازان شخص اولاراق اونون اجتماعی شبکه‌لرده خبرینی پایلاشماغی و دوست-تانیشلارینیزا چاتدیریب، هابئله اونلارین دا اجتماعی شبکه‌لرده دوست-تانیشلارینا تانیتدیرماغینی گؤزله‌ییریک. بو ایش اوچون دیلکچه‌نین آلتیندا اولان پایلاشیم دویمه‌لریندن استفاده ائده بیلرسینیز. دیلکچه‌لرین آدرسلرینی ده کوپی ائدیب، مختلف یوللارلا او جومله‌دن ایمیل و اجتماعی شبکه‌لرین واسطه‌سی ایله دوستلارا چاتدیرا بیلرسینیز. دادخواست اکیپی ده تلگرام، توییتر، اینستاگرام و فیسبوک کیمی اؤز اجتماعی شبکه‌لرینده و دیلکچه‌لی‌لرین جامعه‌سیندن اونو دستکله‌مه‌یی و امضالاماغینی و هابئله تانیدیرماسینی ایسته‌ییر. دیلکچه اکیپی عینی و یا بنزر قونولو دیلکچه‌لر یولو ایله داها اؤنجه گوندمه گتیرمیش اولابیله‌جه‌یی ندنی ایله بعضی دوروملاردا بو فعالیتی آزالتما حاققینی اؤزونه ساخلاییر.
نییه من گؤندردیییم بیر دیلکچه هله یایینلانماییب‌دیر؟
دادخواست اکیپی گئنللیکله هامیسینی دا اولماسا، آمما آلینان دیلکچه‌لرین بیر چوخونو یایینلایار. بیر دیلکچه‌نین یایینلانماسی‌نین مختلف سبب‌لری اولسا دا، آمما چوخلو داها اؤنجه همن موضوع بیر و یا بیر نئچه دیلکچه‌ده آچیقلانماسی‌دیر. هابئله بیر متن، «بلدچی» بؤلومونده گلن قایدا قوراللارا اویمایا بیلر ده. بیز بونو دیلکچه‌نی یازان شخصله دانیشاریق (اونون ایمیلی معتبر اولسا). دیگر دوروملاردا ایسه سیرایا اویولماسیندان دولایی دیلکچه‌نین یایینلانماسیندا بالاجا بیر گئجیکمه یاشانا بیلر.
