گیشین دربری پہ اَرزی نبیسگ واست ءَ
دادخواست ءِ کارمرز کنگ ءِ داب
اگاں شُمے نبشتانک تیار انت، توانت سرگیج بکن اِت ءُ وت چار گام ءَ سرجم کن اِت۔ گُڈسر ءَ شمے اَرزی ایر بیت تاں کہ تپّاسگ بہ بیت ءُ شِنگ بہ بیت۔
دادخواست ءِ ٹولی ئے هِزمَت
هِزمَت اِش انت کہ اگاں شمے نبشتانک رِدکاری بہ لوٹی، راستال تپّاسگ بہ لوٹی یا کہ کانونی لہازا چارگ بہ لوٹی۔ اگاں رجانک لوٹی، ما وتی زور ءَ جنیں کہ ھِزمت بکنیں۔
کِردانک
ھرچ نبشتانکے کہ مان دادخواست ءَ شِنگ بیت، بایدیں وت تَندجاہ ءِ کانون ءُ دستور ءَ ھم گرنچ بہ بنت۔ ئے باروا دادخواست ئے تَندجاہ ءِ کانون ان بہ چار اِت۔
ھاس ئے دوئین دستور ءَ دلگوش ب دار اِت:
- ھرکس کہ نبشتانک دیم دنت، وت زمّہ دار انت کہ آئی ئے نبشتانک کسے سرا بےاِزّتی نکنت، ہچ کسے کانونی ھکّ ءَ لگت مال نکنت، ھچ کسے اِهوت ءَ ھِلاپ کاری نکنت۔ إشی یے بُندَر، نِدَرلئیند ءِ مُلکے کانون انت۔
- « دادخواست» چیزے شنگ نکنت کہ آئی ئے تہ ءَ یک مردمے یا چیزے مردم، مُپت ءَ یا که پہ دروگ، زالم یا کہ ایردست پیش دارگ بیتگ انت۔ یا کہ پہ دگرانی وش دل کنگ ءَ، دگہ مردماں سَرهَکّ بکن انت یا کہ پہ زوراکی ءَ آھانی ھکّ ءَ بگر انت۔ ھمہ داب ءَ دگراں سلّیں نام مبندنت۔
گیشین دربری پہ اَرزی نبیسگ واست ءَ
چونیں سَرتاک ئے پہ وتی نبشتانک ءَ گِچن بکنیں؟
سَرتاک اولیگیں چیزئے کہ چہ شمے نبشتانک ءَ گِندگ بیت ءُ باز اِھم دار اِنت کہ بتوانت وانوکاں وتی نیمگ ءَ بِکشّی۔ وانوک بایدں چہ شمہ سَرتاک ءَ سرپد بہ بیت کہ نبشتانک ءِ بُنگَپّ چی اِنت ءُ لوٹ اِت چی ءَ بدل بکن اِت یا کہ کجام نا اَدالتی ءَ ھلاس بکن اِت۔
گْوَنڈ بہ لِکّ اِت
سَرتاک بایدں یکّیں چارگ ءَ گندگ ءُ دربرگ بہ بیت۔ پہ سوشال میدیا شِنگ کنگ ءِ واستا ھم هَمدَپ بہ بنت۔ سوج دئگ بیت کہ ۱۰ گال بہ بنت۔
سَرتاک بایدیں وت مئے لوٹ ءَ ھمدپ بہ بیت
مان سَرتاک ءَ بایدیں بگوش اِن کہ چی ئے واستا اَرزی دئگ اِن ءُ مئے واھگ چی اِنت۔ ئے وڑ ءَ وانوک ءِ کہ وت ما ھمدپ اِنت، شئوک بیت کہ نبشتانک ءَ بوان ایت ءُ دزنام بجنت۔
دِلکَشّ بہ نِبیس اِت
سَرتاک بایدیں دِلکَشّ ءُ مھرانک بہ بیت ءُ وانوک ءَ دلگوش بکنت۔
جێڑَه چی اِنت؟
نبشتانک نبایدیں وت دراجیں ءُ بی ھاجتیں پێشگال ءَ بُندات بیت۔ تَچک ءَ تَچک اسلی جیڑہ بایدیں آرگ بیت، گُڈسرا اگاں گیشین ھبر ھستت، آرگ بہ بنت ءُ پدا آسرا اسلی جیڑہ یک رندے دگے آرگ بہ بی۔ ئے داب ءَ تونیں نبشتانکہ رِد و بَند ءَ پیش بکنیں: ۱) گونڈ ءُ تچک وتی جیڑہ ءَ بیارن، ۲) ئے جیڑہ چی ئے ءُ چینچو وھدں کہ ھستن، ۳) چی لوٹت کہ بدل بہ بیت؟
واھگ بایدیں تچک ءُ ساپ زاھر بہ بیت
ھم جیڑہ بایدیں ساپ بہ بیت ھم واھگ۔ وت یک اَرزی ے درو مُلکے ءُ اِمرۆز ءِ جیڑہ گِیشّینَگ نہ بنت۔ نبشتانک بایدیں یک جیڑہ ئے بابت ءَ بہ بیت۔
ساپیں ءُ ھکّ لوٹوکیں گال
نبشتانک بایدیں کانودی زُبانزانتی سرا بہ بی۔ تیزیں ءُ زھریں گال، دروگ ءُ گیشیں۔۔۔ ماں مہ بیت، ئے درو نبشتانک ءَ بی زات کن انت۔ ھچ بےاِزّتی ماں مبیت۔
منی جیڑہ تئی جیڑہ ھم ھست
نبشتانک بایدیں ھرچ ے گیشتریں مردمے کہ توانت دلگوش بکنت۔ سرپد بہ بِت کہ مردم دْرێگَتی وت شمہ جیڑہ ءَ ھمدپ انت بلے ئے داب ءَ کہ شما ھبر کوتگ پسُند نہ انت۔ منی جیڑہ تئی جیڑہ ھم ھست، بایدیں کوشش بکن اِنت کہ زُبان ھم یکے بہ بیت۔
نبشتانک ءِ نَکش
دادخواست وت کارزانتیں نَکش کَشاں شمے نبشتانک ءِ واستا نَکش اڈ کنت۔ شما توانت نکشے سرگیج بکن اِت ءُ مئے نَکش کشاں مَدتّ بکن اِت۔
چونیں نکشے گِچن بکن اِن
نَکش بایدیں وت جیڑہ ھمدپ بہ بیت، اگاں لوٹت دولتی مردمے چیزے بدل بکن اِت، بایدیں آئی ئے ھمدپ بہ بیت۔ گِھتر انت کہ مردمے نکش ھور بہ بیت، اگاں جاگاھے نَکش انت، بایدیں وت جیڑہ ءَ ھمگرنچ بہ بیت (اگاں مُلکے نام گِرگ بیت، توانت آ مُلکے نَکش بہ بیت)۔
مَهلوک پئیسَلَهساز اَنت
ھرچ نبشتانکے یک مَھلوکے ءَ گوں ھبر کنت، یک مردمے یا کہ یک دولتی واکدارے کہ توانت پئیسلہ بکنت۔ پمیشکا آ مردما ماں اَرزی ءَ پئیسلہ ساز گوشگ بیت۔
چۆناها پئیسلہ ساز بایدیں بتوانت ئے جیڑہ ئے تہ ءَ پئیسلہ ھم بکنت۔ چۆ که اگاں بہ لوٹ اِن پہ کار کنگے جاور ءَ ،کارجاھانی تہ ءَ جُھدکاری بہ بیت کہ کار کنوکانی واستا بَد و بێرانی مکپی۔ مئے نبشتانک بایدین کارے وزیر سرا بہ بیت نہ کہ مُلکے واجَکارے جِند سرا۔
پئیسلہ سازے گِپّال ڈَسّ
کوشست بہ بیت کہ پئیسلہ کنوکے گِپّال ڈَسّ درگیجگ بہ بیت کہ اَرزی پہ آئی ئے گِپّال ڈَسّے سرا دیم دئگ بہ بیت۔ اگاں در نکپت، مھتل مکن اِت ءُ اَرزی ءَ دیم بدئے اِت۔ تَندجاہ ے ٹولی وت کوشست کنت کہ گِپّال ڈَسّ ءَ در بگیج ایت۔
اَنچُناێن جُست
یک اَرزی ئے چونکا مئے درد ءَ وارت؟
یک اَرزی ئے توانت اَدالت لوٹوکے توار ءَ چِست بکن اَنت ءُ راجمان ے تہ ءَ بہ بارت۔ توانت یک چاگردے یا کہ سیاسی جیڑہ ے ءَ مردمانی دیما پیش بکنت۔ دولتی واکدار یا کہ پئیسلہ سازہ ے ءَ نام بِگیری، چہ میتگ ءَ بِگر تاں درو مُلک ے تہ ءَ توانت پَسّئو بِہ لوٹی۔ یک اَرزی ے توانت یک چاگردے یا کہ سیاسی جیڑہ ئے ءَ بدل بکنت۔ چۆناها یک گونڈیں بدلیے ھم توانت مردمانی زندمان ءَ شرتر بکنت۔
اَرزی ے دزنام جنگ چہ دردے وارت؟
یک اَرزی ے توانت یک ھکّ لوٹوکیں مردمے توار ءَ درو راجے توار بکنت۔ چَه اے راها ءُ دزنامانی جم کنگ ءَ اَدالت لوٹیں توار مَزن بیتں۔ سد سی یا کہ ھزار ھزار مردم پہ یک اَرزی ے پَسّئو دئنت۔ ھوارین توار مُشکُل مان کارگ مبی۔
اولی کدم اَرزی دئگ ءِ واستا چی اِنت؟ اَرزی دئگ ءَ چینچو رِد ءُ بند ھست؟
شما توانت یک گونٹیں نبشتانکہ تہ ءَ جیڑہ ءَ پیش بکن اِت:
اِشی کہ اگاں یکے ھکّ ے گِرگ بیتگ یا کہ زِندمانے ڈک جنگ بیتگ، یا کہ کُل راجے سرا، یا کہ چاگردی پریشانی ئے شمے پِگرے تہ ءَ ھست۔ ھما داب ءَ کہ وت وتی سنگت ءَ گپ جَن اِت، اِدا ھم ھمے داب ءَ جیڑہ ءَ پیش بکن اِت۔
اَرزی ءَ چونین رِد ءُ بند بہ بیت؟
اسلی چیز اِش اِنت کہ جیڑہ ے جِند ءَ پیش بکنیں۔ اگاں سرپد اِن کہ یک پئیسلہ سازہ ے ھست، آئی ئے نام ءَ پیش بکنیں۔ چۆناهیگا اَرزی بایدیں یک مُلکہ واکدارے نام ءَ جنگ بیت کہ بہ توانت پئیسلہ بکنت۔
اَرزی ئے نِبشتانک چینچوکیں ے بہ بیت؟
گِھتِر اِنت کہ اَرزی ے نبشتانک دِراج مبیت۔ گونڈین اَرزی گیشتریں وانوک درگیج ایت۔ دِراجین پیشگال زلور نہ اِنت۔ اِشتاپی ءَ اسلی جیڑہ ءَ پیش کن اِت۔ نبشتانک توانت یک یا چنت بَهرَگ بہ بیت۔
اَرزی نبیسگ واستا توانت چہ دادخواست ے تَندجاہ ءَ کُمک بِگر اِت؟
ھَو۔ دادخواست ے ٹولی وت شما ھور انت تاں کہ شمے نبشتانک ءَ رِدکاری بکنت۔
نبیسوک ءُ اَرزی دئوک بایدیں وتی اسلی نام ءَ بدنت؟
نہ۔ شما کہ اَرزی دئوک ءُ نبیسوک اِت توانت وتی جِندے نام ءَ بدئے یا کہ دگے پِرنام ے کارمرز کن اِت۔
چیزے ھست کہ آئی ئے بارگ ءَ اَرزی دئگ مبی؟
ھرچ بُنگَپّے کہ اَدالت لوٹگ ے واستا انت یا کہ راجمانی جیڑہ ئے، آئی ئے باروا توانت اَرزی بدئت۔ ئے دگہ کانونان پہ اَرزی دئگ ءُ بی اِزّتی نکنگے باروا، تَندجاہ ے تہ ءَ بوان اِت۔
دادخواست ے تَندجاہ توانت اَرزی ءَ پہ پئیسلہ ساز واستا دیم بہ دات؟
ھو، اگاں اَرزی بازیں مردمے دست ءَ دزنام جنگ بہ بیت، گُڈ ءَ بیت کنت کہ آ اَرزی ءَ پہ مُلکے یا کہ در مُلکے پئیسلہ سازانی سرا دیم دئگ بہ بیت۔ دیم دئگے سلاہ تَندجاہ ے ٹولی دستا اِنت۔ چۆناهیگا شما وت کہ اَرزی دئوک اِت ھر دمان ءَ کہ لوٹت توانت پئیسلہ ساز ے واستا دیم بدئت۔ دادخواست ے تَندجاہ ے تہ ءَ توانت اَرزی ءَ پی دی اِف وڑا اِیرگیج بکن اِت کہ دزنامی ھم مان انت۔
اَرزی کہ شِنگ بیت گُڈا چی بیت؟
گُڈسرا کہ اَرزی دادخواست ے اسلی تَندجاہ ے تہ ءَ شِنگ بیت (https://www.daadkhast.org)، ما را اُمێت ھست شما کہ اَرزی دئوک اِت، وت اَرزی ے ھال ءَ شِنگ بکن اِت ءُ وتی سنگت ءُ باسکاںی دست ءَ رسین اِت، چَر آھان لوٹت کہ شِنگ بکن انتی۔ ئے کارے واستا شما توانت شِنگ ے نشانگ ءَ کارمرز بکن اِت۔ چۆناهیگا توانت اَرزی ے تَندجاہ ے ڈَسّ و نِشان ءَ ھم نَکل کن اِت ءُ دگہ جاھاں دیم بہ دئے اِت۔ لھتے جاورانی تہ بلکں دادخواست ءَ دگہ جاگاھاں شِنگ ءُ ھالکاری نکوت چی ءَ کہ لھتے دگے ھمے مڑیں جیڑہ پیسرا شِنگ بیتگ انت ءُ تَندجاہ ءَ باز ھالکاری کوتگ، ئے جاورانی تہ ءَ شمے وتی سرا انت کہ شِنگ ءُ ھالکاری کنت۔
من یک اَرزی ے داتگ، چی ءَ تنیگ ءَ شِنگ نبیتگ؟
دادخواست ے تَندجاہ گیشترین اَرزیگان شِنگ کنت بلہ نہ دُرُستاں، شِنگ نبئگ بازیں مکسدے سرا بیت کنت بلے گیشتریں جاورانی تہ ءَ، مکسد اِش اِنت کہ آ جیڑہ ءُ بُنگَپّ بازیں رندا دگہ مردمانی دستا دیم دئگ بیتگ ءُ شِنگ بیتگ۔ ئے مکسد ھم بیت کنت کہ شمے اَرزی مئے کانونی پور ءَ نکوتگ۔ چوناھیا ما ئے گپّاں وت اَرزی دئوک ءَ پیش کنیں ءُ آ سھیگ بیت۔ اگاں اَرزی باز انت ءُ نوبت سرا بیت، کمّے دیر ھم بیت کنت۔
